ՀՀ կրթության, գիտության, մշակույթի և սպորտի նախարարության աջակցությամբ Երևանում մեկնարկում է 2027 թվականի Եվրոպայի վոլեյբոլի մինչև 20 տարեկան տղաների առաջնության որակավորման առաջին փուլը, որն անցկացվում է Արևելյան Եվրոպայի վոլեյբոլի ասոցիացիայի (EEVZA) շրջանակում։
Մրցաշարը տեղի կունենա հոկտեմբերի 28-31-ը Երևանի «Գազպրոմ Արմենիա» ուսումնամարզական համալիրում։
Առաջնությանը կմասնակցեն Հայաստանի, Լեհաստանի, Ուկրաինայի, Լատվիայի, Էստոնիայի և Վրաստանի երիտասարդական հավաքականները, որոնք կպայքարեն Եվրոպայի առաջնության հաջորդ փուլերի ուղեգրերի համար։
Հիշեցնենք՝ 2025 թվականին Հայաստանում անցկացվել էր Եվրոպայի վոլեյբոլի մինչև 16 տարեկանների առաջնությունը:
Հայաստանի հավաքականի մրցակիցներն ու խաղացանկը
Հայաստանի մինչև 20 տարեկան տղաների հավաքականն ընդգրկված է A խմբում, որտեղ կմրցի Ուկրաինայի և Լատվիայի ընտրանիների հետ։
Հայաստանի հավաքականն իր առաջին հանդիպումը կանցկացնի այսօր՝ հոկտեմբերի 28-ին՝ ժամը 19:00-ին, և կմրցի Ուկրաինայի հավաքականի դեմ։ Հանդիպումների մուտքն ազատ է:
Հայաստանի հավաքականի հանդիպումների խաղացանկը՝
- Հոկտեմբերի 28՝ ժամը 19:00, Հայաստան - Ուկրաինա
- Հոկտեմբերի 30՝ ժամը 19:00, Լատվիա - Հայաստան
A խմբում ընդգրկված են Լեհաստանի, Էստոնիայի և Վրաստանի հավաքականները։
Հոկտեմբերի 31-ին տեղի կունենան մրցաշարի եզրափակիչ հանդիպումները։ Ժամը 11:00-ին կմրցեն խմբերի երրորդ տեղերը զբաղեցրած թիմերը, ժամը 14:00-ին՝ երկրորդ տեղերը զբաղեցրած թիմերը, իսկ ժամը 17:00-ին կկայանա խմբերի հաղթողների միջև վճռորոշ հանդիպումը։
Մրցաշարի հաղթող հավաքականն իրավունք կստանա մասնակցելու 2027 թվականի Եվրոպայի Մ20 առաջնության եզրափակիչ փուլին, իսկ երկրորդ և երրորդ տեղերը զբաղեցրած թիմերը կշարունակեն պայքարը որակավորման երկրորդ փուլում։