Ամփոփվել է «Մարգից մինչև ափսե» կրթական ծրագիրը
նոյեմբեր 18, 2026
Կոտայքի մարզի Աբովյան քաղաքի թիվ 2 հիմնական դպրոցի 175 երրորդ դասարանցիներ Պարենի համաշխարհային օրվան նվիրված միջոցառմամբ ամփոփել են բնության պահպանության և առողջ սննդի վերաբերյալ երկշաբաթյա ուսուցումը։
«Մարգից մինչև ափսե» նախաձեռնությունն իրականացվել է ՄԱԿ-ի Պարենի համաշխարհային ծրագրի (ՄԱԿ ՊՀԾ), Ճյուղային սննդի ինստիտուտի և «Դպրոցական սնունդ և երեխաների բարեկեցություն» հիմնարկի համատեղ ջանքերով։ Ծրագիրը համախմբել է տարրական դասարանների աշակերտներին, մանկավարժներին, ծնողներին և ավագ դասարանների կամավորներին՝ նպատակ ունենալով ձևավորել բնության նկատմամբ հոգատար վերաբերմունք, արժևորել սնունդը և բացահայտել առողջ հողի ու կենսաբազմազանության դերը սննդի արտադրության գործընթացում։
Միջոցառման մասնակիցներին ողջունել և Պարենի համաշխարհային օրվա առթիվ շնորհավորել են ծրագրերի ղեկավար Մարիա Մուրադյանը, ՄԱԿ ՊՀԾ ծրագրերի համակարգող Լուսինե Աղաջանյանը և «Դպրոցական սնունդ և երեխաների բարեկեցություն» հիմնարկի տնօրեն Սաթենիկ Մկրտչյանը՝ ընդգծելով առողջ սննդակարգի ամենօրյա պահպանման կարևորությունը։
Ինտերակտիվ դասաժամերի ընթացքում աշակերտներն իրականացրել են հետազոտական աշխատանքներ սերմերի և հողի վերաբերյալ, ուսումնասիրել բույսերի համատեղելիությունը, ինչպես նաև այգու էկոհամակարգում օգտակար միջատների (մեղուների, զատիկների) դերը։ Երեխաները քննարկել են կոմպոստացման և ջրային ռեսուրսների պատասխանատու օգտագործման մեթոդները, կատարել ցանքս և հավաքել իրենց առաջին բերքը։
Ավարտական միջոցառման ընթացքում տեսական գիտելիքներն ամրապնդվել են գործնական ձևաչափով․
• Ինտերակտիվ ներկայացում. «Ո՞ւր կորավ բերքը» բեմադրության ընթացքում աշակերտները գործնական առաջադրանքների և հարցադրումների միջոցով օգնել են վերականգնել այգու բերքը։
• Թիմային մրցույթ. «Փրկե՛նք այգին» խորագրով խաղի շրջանակում մասնակիցները հանելուկների, վիկտորինաների և փոխանցումավազքի միջոցով կիրառել են այգեգործության, կոմպոստացման և առողջ սննդի վերաբերյալ իրենց հմտությունները և կազմել հավասարակշռված «առողջ ափսե»։
• Օրվա ավարտին աշակերտները համատեղ ուժերով հավաքել են դպրոցական այգին և ջերմոցը պատկերող մեծ խճանկար և ստացել խրախուսական մրցանակներ։
Աշակերտական միջոցառմանը զուգահեռ՝ երրորդ դասարանցիների ծնողների համար անցկացվել է վարպետության դաս, որի ընթացքում ներկայացվել են «առողջ ափսեի» սկզբունքները և դպրոցականի տարիքային առանձնահատկություններին համապատասխանող հավասարակշռված ճաշացանկ կազմելու ուղեցույցներ։
ՄԱԿ ՊՀԾ-ն, Ճյուղային սննդի ինստիտուտը և «Դպրոցական սնունդ և երեխաների բարեկեցություն» հիմնարկը Պարենի համաշխարհային օրվան նվիրված կրթական միջոցառումներն իրականացնում են ամենամյա պարբերականությամբ՝ նպաստելով դպրոցականների շրջանում առողջ ապրելակերպի և սննդի մշակույթի արմատավորմանը։