ՀՀ Կառավարության որոշմամբ հաստատվել են բարձրագույն կրթության մասնագիտությունների, դրանց դասիչների (ներառյալ՝ կարգավորող մասնագիտությունների վերաբերյալ հատուկ նշումը), դրանց համապատասխան տրվող որակավորումների ցանկը և դրանց ուսուցման ձևերը:
Իրավական ակտում հստակ սահմանվում են մի շարք հասկացություններ, ինչպես օրինակ՝ «մասնագիտություն», «կրթական ծրագիր» և «որակավորում»։
Մասնագիտությունը սահմանվում է որպես պետության կողմից հաստատված բարձրագույն կրթության տիրույթ, որը բնութագրում է շրջանավարտի մասնագիտական գործունեության լայն շրջանակը, տալիս է նրա մասնագիտական զբաղվածության սահմանները և կարող է ներառել մեկ կամ մի քանի կրթական ծրագիր։
Կրթական ծրագիրը սահմանվում է որպես լիցենզավորման և հավատարմագրման հիմնական օբյեկտ, իսկ որակավորումը՝ տվյալ կրթական ծրագրի ավարտին շնորհվող արդյունք, որը համապատասխանում է տվյալ մասնագիտության շրջանակում բարձրագույն կրթության համապատասխան մակարդակին (բակալավր, մագիստրոս կամ դոկտոր)։
Այս մոտեցումը մի կողմից կապահովի բուհերի ակադեմիական ինքնավարությունը և կրթական ծրագրերի բազմազանությունը, մյուս կողմից էլ կպահպանի համակարգի միասնական կառուցվածքն ու կայունությունը։
Միաժամանակ, կրթական ծրագրերը կկոդավորվեն UNESCO-ի մշակված ISCED-F 2013 միջազգային դասակարգման տրամաբանությամբ՝ միջազգային վիճակագրական ստանդարտների հետ համադրելիությունն ապահովելու նպատակով։
Մասնագիտությունների նոր դասակարգիչը հնարավորություն կտա նաև վերացնելու մասնագիտությունների կրկնությունն ու ավելորդ մանրամասնումները, իրականացնելու առավել արդյունավետ ռազմավարական պլանավորում և պետական կարիքների գնահատում, ապահովելու մասնագիտությունների և որակավորումների ինտեգրումը որակավորումների ազգային շրջանակի հետ, ինչպես նաև ստեղծելու մասնագիտությունների և կրթական ծրագրերի թվային ռեեստրի հիմք։
Հարկ է ընդգծել նաև, որ ՀՀ բարձրագույն կրթության մասնագիտությունների և որակավորումների ցանկը (դասակարգիչը) պարբերաբար վերանայվելու է: Արդյունքում՝ քաղաքացիները կրթության պլանավորման փուլում կկարողանան առավել հստակ պատկերացնել իրենց նախընտրած մասնագիտությամբ հետագա աշխատանքային հնարավորությունները, իսկ գործատուները՝ ավելի ճշգրիտ գնահատել պաշտոնին համապատասխան կարողություններով օժտված մասնագետների ընտրությունը։
Ցանկին կարելի է ծանոթանալ հետևյալ հղմամբ։